ദുനിയാവിനെ കീഴടക്കാൻ ഖുർആനിലെ ഒരു വചനം: സഫലമായ ജീവിതത്തിലേക്കൊരു മാർഗരേഖ

ദുനിയാവിനെ കീഴടക്കാൻ ഖുർആനിലെ ഒരു വചനം: സഫലമായ ജീവിതത്തിലേക്കൊരു മാർഗരേഖ

മനുഷ്യജീവിതത്തിന്റെ ലക്ഷ്യവും അതിലെ ഉയർച്ചതാഴ്ചകളും എപ്രകാരമായിരിക്കണം എന്ന് പരിശുദ്ധ ഖുർആൻ കൃത്യമായി വരച്ചുകാട്ടുന്നുണ്ട്. ലൗകിക സുഖങ്ങളിൽ മതിമറക്കുന്നവനും പ്രയാസങ്ങളിൽ തളർന്നുപോകുന്നവനും ഒരുപോലെ ഉൾക്കൊള്ളേണ്ട വലിയൊരു സത്യം സൂറത്തുൽ ഫജ്‌റിലെ 15, 16 വചനങ്ങളിലുണ്ട്. ഈ വചനങ്ങൾ ശരിയായി മനസ്സിലാക്കി ജീവിതത്തിൽ പകർത്തുന്നവന് ദുനിയാവ് കീഴടങ്ങുമെന്നും അല്ലാഹുവിന്റെ അനുഗ്രഹങ്ങൾ അവനിലേക്ക് ഒഴുകിയെത്തുമെന്നും പണ്ഡിതന്മാർ പഠിപ്പിക്കുന്നു.

1. പരീക്ഷണത്തിന്റെ രണ്ട് മുഖങ്ങൾ
അല്ലാഹു പറയുന്നു:

فَأَمَّا الْإِنسَانُ إِذَا مَا ابْتَلَاهُ رَبُّهُ فَأَكْرَمَهُ وَنَعَّمَهُ فَيَقُولُ رَبِّي أَكْرَمَنِ * وَأَمَّا إِذَا مَا ابْتَلَاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِ

"എന്നാൽ മനുഷ്യന്റെ അവസ്ഥയോ, തന്റെ നാഥൻ അവനെ പരീക്ഷിക്കുകയും, അങ്ങനെ അവന് ആദരവും അനുഗ്രഹങ്ങളും നൽകുകയും ചെയ്താൽ അവൻ പറയും: 'എന്റെ നാഥൻ എന്നെ ആദരിച്ചിരിക്കുന്നു' എന്ന്.
എന്നാൽ, അവനെ പരീക്ഷിക്കുകയും അതിലൂടെ അവന്റെ ഉപജീവനം പരിമിതപ്പെടുത്തുകയും ചെയ്താൽ അവൻ പറയും: 'എന്റെ നാഥൻ എന്നെ അപമാനിച്ചിരിക്കുന്നു' എന്ന്."
(ഖുർആൻ, സൂറത്തുൽ ഫജ്‌ർ: 89: 15-16)

മനുഷ്യൻ സാധാരണയായി ധരിക്കുന്നത് സമ്പത്ത് വർദ്ധിക്കുന്നത് അല്ലാഹുവിന്റെ സ്നേഹത്തിന്റെ അടയാളമാണെന്നും, ദാരിദ്ര്യം അല്ലാഹുവിന്റെ വെറുപ്പിന്റെ അടയാളമാണെന്നുമാണ്. എന്നാൽ ഖുർആൻ ഈ ചിന്താഗതിയെ തിരുത്തുന്നു. സമ്പത്തും ദാരിദ്ര്യവും അല്ലാഹുവിന്റെ പരീക്ഷണങ്ങൾ (ابتلاء) മാത്രമാണ്. സമ്പന്നൻ തന്റെ സമ്പത്ത് എങ്ങനെ വിനിയോഗിക്കുന്നുവെന്നും ദരിദ്രൻ തന്റെ അവസ്ഥയിൽ എങ്ങനെ ക്ഷമിക്കുന്നുവെന്നുമാണ് അല്ലാഹു നോക്കുന്നത്.

2. വിശ്വാസിയുടെ കരുത്ത്
ഈ പരീക്ഷണങ്ങളിൽ വിജയിക്കാൻ നബി (ﷺ) നൽകിയ ഉപദേശം ശ്രദ്ധേയമാണ്:

عَجَباً لأَمْرِ المُؤْمِنِ إِنَّ أَمْرَهُ كُلَّهُ خَيْرٌ، إِنْ أَصَابَتْهُ سَرَّاءُ شَكَرَ فَكَانَ خَيْراً لَهُ، وَإِنْ أَصَابَتْهُ ضَرَّاءُ صَبَرَ فَكانَ خَيْراً لَهُ
"സത്യവിശ്വാസിയുടെ കാര്യം അത്ഭുതം തന്നെ! അവന്റെ എല്ലാ കാര്യങ്ങളും അവന് ഗുണകരമാണ്. അവന് സന്തോഷകരമായ വല്ലതും ലഭിച്ചാൽ അവൻ നന്ദി കാണിക്കുന്നു (ശുക്ർ ചെയ്യുന്നു); അത് അവന് ഗുണകരമായി ഭവിക്കുന്നു. ഇനി അവന് വല്ല പ്രയാസവും ബാധിച്ചാൽ അവൻ ക്ഷമിക്കുന്നു (സബർ ചെയ്യുന്നു); അതും അവന് ഗുണകരമായി ഭവിക്കുന്നു."
(സ്വഹീഹ് മുസ്ലിം: 2999)

അല്ലാഹുവിനെ 'അൽ-ബാസിത്' (വിശാലമാക്കുന്നവൻ), 'അൽ-ഖാബിള്' (പിടിച്ചുവെക്കുന്നവൻ) എന്നീ നാമങ്ങളിലൂടെ തിരിച്ചറിയുന്നവൻ ഒന്നിനും മുന്നിൽ തളരില്ല. അല്ലാഹുവിലുള്ള അചഞ്ചലമായ വിശ്വാസവും (തവക്കുൽ) തഖ്‌വയുമാണ് ഐശ്വര്യത്തിലേക്കുള്ള യഥാർത്ഥ താക്കോൽ.

3. അധ്വാനത്തിന്റെ മഹത്വം
പ്രാർത്ഥനയോടൊപ്പം തന്നെ അധ്വാനവും അനിവാര്യമാണെന്ന് ഇസ്ലാം പഠിപ്പിക്കുന്നു. സഹായം തേടിവന്ന അൻസാരിയായ സ്വഹാബിക്ക് നബി (ﷺ) സ്വന്തം കൈകൊണ്ട് വിറക് വെട്ടാനുള്ള കോടാലി ഉണ്ടാക്കി നൽകിയ ചരിത്രം വലിയൊരു പാഠമാണ്. (അബൂദാവൂദ്: 1641, ഇബ്നു മാജ: 2198). മറ്റുള്ളവർക്ക് മുന്നിൽ കൈനീട്ടുന്നതിനേക്കാൾ അന്തസ്സ് സ്വന്തം അധ്വാനം കൊണ്ട് ജീവിക്കുന്നതിലാണ്.

പക്ഷികളെപ്പോലെ അല്ലാഹുവിൽ ഭരമേൽപ്പിക്കാൻ നമുക്ക് കഴിയണം:

لَوْ أَنَّكُمْ تَوَكَّلْتُمْ عَلَى اللهِ حَقَّ تَوَكُّلِهِ لَرَزَقَكُمْ كَمَا يَرْزُقُ الطَّيْرَ، تَغْدُو خِمَاصاً وَتَرُوحُ بِطَاناً
"നിങ്ങൾ അല്ലാഹുവിൽ അർപ്പിക്കേണ്ട വിധം യഥാർത്ഥമായി ഭരമേൽപ്പിക്കുകയാണെങ്കിൽ (തവക്കുൽ), പക്ഷികൾക്ക് അവൻ ആഹാരം നൽകുന്നത് പോലെ നിങ്ങൾക്കും അവൻ ആഹാരം നൽകുന്നതാണ്. അവ (പക്ഷികൾ) രാവിലെ വിശന്ന വയറുമായി പുറപ്പെടുകയും വൈകുന്നേരം നിറഞ്ഞ വയറുമായി തിരിച്ചെത്തുകയും ചെയ്യുന്നു."
(സുനനുത്തിർമിദി: 2344, ഇബ്നു മാജ: 4164)

4. തഖ്‌വയും ഉപജീവനവും
അല്ലാഹുവിനെ സൂക്ഷിച്ചു ജീവിക്കുന്നവർക്ക് അവൻ വാഗ്ദാനം ചെയ്യുന്നത് ഇതാണ്:

وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يحتسب
"...ആര് അല്ലാഹുവെ സൂക്ഷിക്കുന്നുവോ (തഖ്‌വ കാണിക്കുന്നുവോ), അവന് അവൻ ഒരു പോംവഴി ഉണ്ടാക്കിക്കൊടുക്കുന്നതാണ്. അവൻ കണക്കുകൂട്ടാത്ത വശത്തിലൂടെ അവന് ഉപജീവനം നൽകുകയും ചെയ്യുന്നതാണ്."
(ഖുർആൻ, സൂറത്തു ത്വലാഖ്: 65: 2-3)

ആരെങ്കിലും പരലോകത്തെ ലക്ഷ്യമാക്കി ജീവിക്കുന്നുവോ, അവന് അല്ലാഹു ഹൃദയത്തിൽ ഐശ്വര്യം നൽകും. ദുനിയാവാകട്ടെ അവന്റെ മുന്നിൽ കീഴടങ്ങുകയും ചെയ്യും. എന്നാൽ ദുനിയാവിനെ മാത്രം ലക്ഷ്യം വെക്കുന്നവന്റെ ദാരിദ്ര്യം അവന്റെ കണ്ണുകൾക്ക് മുന്നിലായിരിക്കും. അതിനാൽ, അല്ലാഹു നൽകുന്ന പരീക്ഷണങ്ങളിൽ പതറാതെ, തഖ്‌വയോടും അധ്വാനത്തോടും കൂടി മുന്നോട്ട് പോകുന്നവനാണ് യഥാർത്ഥ വിജയി.
ഇക്കൂട്ടരിൽ അല്ലാഹു നമ്മെയും ഉൾപ്പെടുത്തട്ടെ, ആമീൻ 

ഇത് മറ്റുള്ളവർക്ക് ഫോർവേഡ് ചെയ്തു പ്രതിഫലത്തിൽ പങ്കാളിയാവുക.
നിങ്ങളുടെ വിലപ്പെട്ട സമയത്തുള്ള ദുആയിൽ ഈ വിവിനീതനായും ഉൾപ്പെടുത്തുക.
സന്ദർശിക്കുക  
www.islamkerala.com 

സി പി അബ്ദുല്ല ചെരുമ്പ 
9400534861