അസ്മാഉൽ ഹുസ്ന വിവരണവും പുണ്യങ്ങളും

തൗഹീദിന്റെയും ഈമാനിന്റെയും പൂർത്തീകരണം: 

അല്ലാഹുവിന്റെ നാമങ്ങൾ വിളിച്ചു പ്രാർത്ഥിക്കുന്നതിലൂടെ അവന്റെ ഏകത്വത്തെയും (തൗഹീദ്) പരിപൂർണ്ണതയെയും ദാസൻ അംഗീകരിക്കുകയാണ്. അല്ലാഹുവിന്റെ അറിവ്, കഴിവ്, കാരുണ്യം, ഔദാര്യം തുടങ്ങിയ ഗുണങ്ങളെക്കുറിച്ച് ആഴത്തിൽ ചിന്തിക്കാനും അതനുസരിച്ച് അവനെ ആരാധിക്കാനും ഇത് സഹായിക്കുന്നു.

ജീവിതത്തിൽ പകർത്തൽ: അല്ലാഹുവിന്റെ നാമങ്ങളുടെ അർത്ഥം ജീവിതത്തിൽ പകർത്താൻ ഇത് സഹായിക്കുന്നു. ഉദാഹരണത്തിന്, അല്ലാഹു 'അൽ-ലത്വീഫ്' (സൂക്ഷ്മജ്ഞാനിയും ദയാലുവും) ആണെന്നറിയുന്നവൻ മറ്റുള്ളവരോട് ദയയോടെ പെരുമാറും. അവൻ 'അൽ-ഗഫൂർ' ആണെന്നറിയുന്നവൻ മറ്റുള്ളവർക്ക് മാപ്പ് നൽകാൻ തയ്യാറാകും. 
അങ്ങനെ ദിക്റ് എന്നത് വെറുമൊരു ചൊല്ലൽ മാത്രമല്ല, സ്വഭാവരൂപീകരണം കൂടിയായി മാറുന്നു.

സ്തുതി കീർത്തനം: അല്ലാഹുവിന്റെ മഹത്വത്തിനൊത്ത വിധം അവനെ പുകഴ്ത്താനുള്ള മാർഗ്ഗമാണിത്. നിരന്തരമായി അല്ലാഹുവിനെ സ്തുതിക്കുന്നത് മനസ്സിന് സമാധാനവും ശാന്തിയും നൽകും.

അസ്മാഉൽ ഹുസ്ന: ലഘുവായ വിവരണം
തിരഞ്ഞെടുക്കപ്പെട്ട ചില നാമങ്ങളുടെ അർത്ഥവും ആശയവും താഴെ നൽകുന്നു:

1. അല്ലാഹു (الله): ഇത് അല്ലാഹുവിന്റെ മാത്രം പേരാണ് (ഇസ്മു ദാത്ത്). മറ്റാർക്കും ഈ പേര് ഉപയോഗിക്കാൻ പാടില്ല. യഥാർത്ഥ ആരാധ്യനായ, ആകാശഭൂമികൾക്ക് ഉടമയായ സ്രഷ്ടാവിന്റെ പേരാണിത്.

2. അർ-റഹ്‌മാൻ, അർ-റഹീം 
‎الرحمن - الرحيم): പരമകാരുണികനും കരുണാനിധിയും. 'റഹ്‌മാൻ' എന്നത് അല്ലാഹുവിന് മാത്രം അവകാശപ്പെട്ട പേരാണ്.

‎(قُلِ ٱدۡعُوا۟ ٱللَّهَ أَوِ ٱدۡعُوا۟ ٱلرَّحۡمَـٰنَ) 
“നബിയേ പറയുക: നിങ്ങൾ അല്ലാഹു എന്ന് വിളിച്ചുകൊള്ളുക, അല്ലെങ്കിൽ റഹ്‌മാൻ എന്ന് വിളിച്ചുകൊള്ളുക...) - [അൽ-ഇസ്രാ: 110]. '
‘റഹ്‌മാൻ' എന്നാൽ കാരുണ്യം എന്ന ഗുണം അതിന്റെ പൂർണ്ണതയിൽ ഉള്ളവൻ എന്നും, 'റഹീം' എന്നാൽ ആ കാരുണ്യം മറ്റുള്ളവരിലേക്ക് ചൊരിയുന്നവൻ എന്നുമാണ് അർത്ഥം.

3. അൽ-മലിക് (الملك): രാജാധിരാജൻ. എല്ലാം അവന്റെ ഉടമസ്ഥതയിലാണ്.

‎(إِن كُلُّ مَن فِی ٱلسَّمَـٰوَ ٰ⁠تِ وَٱلۡأَرۡضِ إِلَّاۤ ءَاتِی ٱلرَّحۡمَـٰنِ عَبۡدࣰا) 
“ആകാശങ്ങളിലും ഭൂമിയിലുമുള്ള ഏതൊരാളും ഒരു ദാസനെന്ന നിലയിൽ പരമകാരുണികന്റെ അടുത്ത് വരുന്നവനായിരിക്കും) - [മർയം: 93].

4. അൽ-ഖുദ്ദൂസ് (القدوس): 
എല്ലാ ന്യൂനതകളിൽ നിന്നും പരിശുദ്ധനായവൻ. 
എല്ലാ കുറവുകളിൽ നിന്നും മുക്തൻ.

5. അസ്-സലാം (السلام): രക്ഷയായവൻ/സമാധാനം നൽകുന്നവൻ. 
ആരിൽ നിന്നാണോ ദോഷങ്ങൾ വരാത്തത്, നന്മയും ശാന്തിയും മാത്രം പ്രതീക്ഷിക്കാവുന്നത്, അവനാണ് അസ്-സലാം.

6. അൽ-മുഅ്മിൻ (المؤمن): അഭയം നൽകുന്നവൻ. ഭയത്തിൽ നിന്ന് സമാധാനവും സുരക്ഷിതത്വവും നൽകുന്നവൻ.

‎(ٱلَّذِیۤ أَطۡعَمَهُم مِّن جُوعࣲ وَءَامَنَهُم مِّنۡ خَوۡفِۭ) 
“വിശപ്പിന് ആഹാരം നൽകുകയും, ഭയത്തിന് സമാധാനം നൽകുകയും ചെയ്തവൻ) - [ഖുറൈശ്: 4].

7. അൽ-മുഹൈമിൻ (المهيمن): കാത്തുരക്ഷിക്കുന്നവൻ/ മേൽനോട്ടം വഹിക്കുന്നവൻ. അവന്റെ അറിവിനോ അധികാരത്തിനോ പുറത്ത് ഒന്നും തന്നെയില്ല.

8. അൽ-അസീസ് (العزيز): പ്രതാപവാന്. ആർക്കും തോൽപ്പിക്കാൻ കഴിയാത്തവൻ.

‎(مَن كَانَ يُرِيدُ الْعِزَّةَ فَلِلَّهِ الْعِزَّةُ جَمِيعًا) “ആരെങ്കിലും പ്രതാപം ആഗ്രഹിക്കുന്നുവെങ്കിൽ, പ്രതാപം മുഴുവൻ അല്ലാഹുവിനാകുന്നു) - [ഫാത്വിർ: 10].

9. അൽ-ജബ്ബാർ (الجبار): പരമാധികാരി/ നിർബന്ധിക്കുന്നവൻ. 
സൃഷ്ടികൾക്ക് മുകളിൽ പരമാധികാരമുള്ളവൻ.

‎(أَلَا لَهُ الْخَلْقُ وَالْأَمْرُ) 
“അറിയുക, സൃഷ്ടിപ്പും ശാസനാധികാരവും അവന് മാത്രമാണ്) - [അഅ്റാഫ്: 54].

10. അൽ-മുതകബ്ബിർ (المتكبر): മഹത്വമുള്ളവൻ. സൃഷ്ടികളുടെ ഗുണങ്ങളിൽ നിന്നെല്ലാം ഉന്നതനായവൻ. 'കിബ്‌രിയ' (മഹത്വം) എന്നത് അല്ലാഹുവിന്റെ മാത്രം അവകാശമാണ്. അതിൽ ആരെങ്കിലും തർക്കിച്ചാൽ അല്ലാഹു അവനെ നശിപ്പിക്കും.

11. അൽ-ബാരിഅ് (البارئ): സൃഷ്ടിക്കുന്നവൻ (പ്രത്യേകിച്ച് ജീവജാലങ്ങളെ).

12. അൽ-മുസ്വവ്വിർ (المصور): രൂപം നൽകുന്നവൻ. 
വ്യത്യസ്ത രൂപങ്ങളിൽ സൃഷ്ടികളെ രൂപപ്പെടുത്തുന്നവൻ.

‎(هُوَ الَّذِي يُصَوِّرُكُمْ فِي الْأَرْحَامِ كَيْفَ يَشَاءُ) (ഗർഭാശയങ്ങളിൽ അവനുദ്ദേശിക്കുന്ന വിധത്തിൽ നിങ്ങൾക്ക് രൂപം നൽകുന്നത് അവനാകുന്നു) - [ആലുഇംറാൻ: 6]. കോടിക്കണക്കിന് മനുഷ്യരുണ്ടായിട്ടും വിരലടയാളങ്ങൾ പോലും വ്യത്യസ്തമായിരിക്കുന്നത് അവന്റെ വൈഭവമാണ്.

13. അൽ-ഖാലിഖ് (الخالق): ഇല്ലായ്മയിൽ നിന്ന് സൃഷ്ടിക്കുന്നവൻ.

‎(أَفَمَن يَخْلُقُ كَمَن لَّا يَخْلُقُ) (അപ്പോൾ സൃഷ്ടിക്കുന്നവൻ സൃഷ്ടിക്കാത്തവനെപ്പോലെയാണോ?) [അന്നഹ്‌ൽ: 17].

14. അൽ-ഗഫ്ഫാർ (الغفار): ഏറെ പൊറുക്കുന്നവൻ. ദാസൻ തെറ്റുകൾ ആവർത്തിക്കുമ്പോഴും, വീണ്ടും വീണ്ടും മാപ്പ് നൽകുന്നവൻ. തെറ്റുകളെ മറച്ചുവെക്കുന്നവൻ.

15. അൽ-ഖഹ്ഹാർ (القهار): അടക്കിഭരിക്കുന്നവൻ. അവന്റെ തീരുമാനം ആർക്കും തടയാനാവില്ല.

‎(وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ ۝ وَهُوَ الْقَاهِرُ فَوْقَ عِبَادِهِ) 
“അല്ലാഹു നിനക്ക് വല്ല ദോഷവും വരുത്തിവെക്കുകയാണെങ്കിൽ അത് നീക്കം ചെയ്യാൻ അവനല്ലാതെ മറ്റാരുമില്ല. അവൻ നിനക്ക് വല്ല ഗുണവും വരുത്തുകയാണെങ്കിൽ അവൻ ഏത് കാര്യത്തിനും കഴിവുള്ളവനാകുന്നു. അവനാണ് തന്റെ ദാസന്മാർക്ക് മീതെ പരമാധികാരമുള്ളവൻ) 
അൽ-അൻആം: 17,18].

16. അൽ-വഹ്ഹാബ് (الوهاب): ഔദാര്യമായി നൽകുന്നവൻ.

‎(وَأَنَّ الْفَضْلَ بِيَدِ اللَّهِ يُؤْتِيهِ مَن يَشَاءُ ۗ وَاللَّهُ وَاسِعٌ عَلِيمٌ) 
“അനുഗ്രഹം അല്ലാഹുവിന്റെ കൈയിലാണ്. അവനിഷ്ടമുള്ളവർക്ക് അവനത് നൽകുന്നു. അല്ലാഹു വിശാലമായി നൽകുന്നവനും എല്ലാം അറിയുന്നവനുമാണ്) - [ആലുഇംറാൻ: 73].

17. അർ-റസ്സാഖ് (الرزاق): ഉപജീവനം നൽകുന്നവൻ.

‎(إِنَّ اللَّهَ هُوَ الرَّزَّاقُ ذُو الْقُوَّةِ الْمَتِينُ) (തീർച്ചയായും അല്ലാഹു തന്നെയാണ് ഉപജീവനം നൽകുന്നവനും, ശക്തനും, പ്രബലനും) - [അദ്ദാരിയത്ത്: 58].

18. അൽ-ഫത്താഹ് (الفتاح): തുറന്നുകൊടുക്കുന്നവൻ. അറിവിന്റെയും ഉപജീവനത്തിന്റെയും വാതിലുകൾ തുറക്കുന്നവൻ.

‎(مَّا يَفْتَحِ اللَّهُ لِلنَّاسِ مِن رَّحْمَةࣲ فَلَا مُمۡسِكَ لَهَاۖ وَمَا یُمۡسِكۡ فَلَا مُرۡسِلَ لَهُۥ مِنۢ بَعۡدِهِ) (അല്ലാഹു മനുഷ്യർക്ക് വല്ല കാരുണ്യവും തുറന്നുകൊടുത്താൽ അത് പിടിച്ചുവെക്കാൻ ആർക്കും കഴിയില്ല. അവൻ വല്ലതും പിടിച്ചുവെച്ചാൽ അത് വിട്ടുകൊടുക്കാനും ആർക്കും കഴിയില്ല) - [ഫാത്വിർ: 2].

19. അൽ-ഖാബിള്, അൽ-ബാസിത്വ് (القابض - الباسط): പിടിച്ചുവെക്കുന്നവനും വിശാലമാക്കുന്നവനും.

‎(ٱللَّهُ یَبۡسُطُ ٱلرِّزۡقَ لِمَن یَشَاۤءُ مِنۡ عِبَادِهِۦ وَیَقۡدِرُ لَهُۥۤۚ إِنَّ ٱللَّهَ بِكُلِّ شَیۡءٍ عَلِیمࣱ) (അല്ലാഹു തന്റെ ദാസന്മാരിൽ നിന്ന് താനിച്ഛിക്കുന്നവർക്ക് ഉപജീവനം വിശാലമാക്കികൊടുക്കുകയും, (താനിച്ഛിക്കുന്നവർക്ക്) അത് ഇടുങ്ങിയതാക്കുകയും ചെയ്യുന്നു) - [അൽ-അൻകബൂത്ത്: 62]. ഇക്കാര്യത്തിൽ ആർക്കും ഇടപെടാനോ ചോദ്യം ചെയ്യാനോ അവകാശമില്ല.

20. അൽ-ഖാഫിദ്, അർ-റാഫിഅ് / അൽ-മുഇസ്സ്, അൽ-മുദിൽ 
‎الخافض الرافع - المعز المذل): താഴ്ത്തുന്നവനും ഉയർത്തുന്നവനും / പ്രതാപം നൽകുന്നവനും നിന്ദ്യനാക്കുന്നവനും. ലോകത്ത് പലരും പ്രതാപികളായി നടക്കുന്നുണ്ടാവാം, പക്ഷെ പരലോകത്ത് അവർ നിന്ദ്യരായിരിക്കും. എന്നാൽ ദുനിയാവിൽ ആരും ഗൗനിക്കാത്ത പലരും പരലോകത്ത് ഉന്നതരുമായിരിക്കും. പരലോകത്ത് കാര്യങ്ങൾ അതിന്റെ യഥാർത്ഥ രൂപത്തിൽ വെളിപ്പെടും.

‎(إِذَا وَقَعَتِ ٱلۡوَاقِعَةُ ۝ لَیۡسَ لِوَقۡعَتِهَا كَاذِبَةٌ ۝ خَافِضَةࣱ رَّافِعَةٌ) (
“ആ സംഭവം (അന്ത്യദിനം) സംഭവിച്ചാൽ... അതൊരു താഴ്ത്തലും ഉയർത്തലും ആയിരിക്കും) - [അൽ-വാഖിഅ: 1-3]. അല്ലാഹു ഉയർത്തിയവനെ താഴ്ത്താൻ ആർക്കും കഴിയില്ല, അവൻ താഴ്ത്തിയവനെ ഉയർത്താനും ആർക്കും കഴിയില്ല. 
‎إِن یَنصُرۡكُمُ ٱللَّهُ فَلَا غَالِبَ لَكُمۡۖ وَإِن یَخۡذُلۡكُمۡ فَمَن ذَا ٱلَّذِی یَنصُرُكُم مِّنۢ بَعۡدِهِ) (അല്ലാഹു “നിങ്ങളെ സഹായിക്കുന്നുവെങ്കിൽ നിങ്ങളെ തോൽപ്പിക്കാൻ ആരുമില്ല. അവൻ നിങ്ങളെ കൈവിട്ടാൽ പിന്നെ ആരാണ് നിങ്ങളെ സഹായിക്കാനുള്ളത്?) - [ആലുഇംറാൻ: 160].

21. അസ്-സമീഅ്, അൽ-ബസ്വീർ (
‎السميع - البصير): 
എല്ലാം കേൾക്കുന്നവനും കാണുന്നവനും. മൂസാ നബി(അ)യും ഹാറൂൻ നബി(അ)യും ഫിർഔനിന്റെ അടുത്തേക്ക് പോകാൻ ഭയപ്പെട്ടപ്പോൾ അല്ലാഹു പറഞ്ഞു:

‎(قَالَ لَا تَخَافَاۤۖ إِنَّنِی مَعَكُمَاۤ أَسۡمَعُ وَأَرَىٰ) (അവൻ (അല്ലാഹു) പറഞ്ഞു: നിങ്ങൾ ഭയപ്പെടേണ്ട. തീർച്ചയായും ഞാൻ നിങ്ങളുടെ കൂടെയുണ്ട്. ഞാൻ കേൾക്കുകയും കാണുകയും ചെയ്യുന്നുണ്ട്) - [ത്വാഹാ: 46].
Llllllllllllllllllllllllllllllllllllllllllllllllllll
ഇത് മറ്റുള്ളവർക്ക് ഫോർവേഡ് ചെയ്ത് 
പ്രതിഫലത്തിൽ പങ്കാളിയാവുക!
നിങ്ങളുടെ വിലപ്പെട്ട സമയത്തുള്ള ദുആ യിൽ  നമ്മേയും ഉൾപ്പെടുത്തുക!
സന്ദർശിക്കുക : 
www.islamkerala.com
        സി പി അബ്ദുല്ല ചെരുമ്പ 
                   9400534861